കൽപറ്റ: വിദേശ അധിനിവേശത്തിനെതിരെ പോരാടിയ ഗോത്രവർഗ സ്വാതന്ത്ര്യസമര സേനാനികളുടെ സ്മരണയ്ക്കായി സുഗന്ധഗിരിയിൽ നിർമിക്കുന്ന ഗോത്ര സ്വാതന്ത്ര്യസമര സേനാനി മ്യൂസിയത്തിന്റെ നിർമാണ പ്രവൃത്തി കൃഷി മന്ത്രി അഡ്വ. ടി. സിദ്ദിഖ് സ്ഥലത്തെത്തി വിലയിരുത്തി. നിർമാണ പുരോഗതിയും പദ്ധതിയുടെ വിവിധ ഘട്ടങ്ങളും ഉദ്യോഗസ്ഥരുമായി മന്ത്രി വിശദമായി അവലോകനം ചെയ്തു.
ഈ വർഷം നവംബർ 15-ന് ബിർസ മുണ്ടയുടെ 150-ാം ജന്മവാർഷിക ദിനത്തിൽ പദ്ധതിയുടെ ആദ്യഘട്ട ഉദ്ഘാടനം നടത്താൻ കഴിയുമെന്ന് അധികൃതർ അറിയിച്ചു.
മൂന്ന് സോണുകളായാണ് നിർമാണ പ്രവർത്തനങ്ങൾ പുരോഗമിക്കുന്നത്. നിലവിൽ രണ്ടും മൂന്നും സോണുകളിലെ പ്രവർത്തനങ്ങളാണ് നടക്കുന്നത്. തദ്ദേശീയരായ ഗോത്രവിഭാഗ തൊഴിലാളികളെ നിർമാണ പ്രവർത്തനത്തിന്റെ ഭാഗമാക്കിയാണ് പദ്ധതി മുന്നോട്ട് കൊണ്ടുപോകുന്നത്.
പദ്ധതിയുടെ തുടർപ്രവർത്തനങ്ങൾ കൂടുതൽ കാര്യക്ഷമമായി മുന്നോട്ട് കൊണ്ടുപോകുന്നതിനായി ആവശ്യമായ മാർഗനിർദേശങ്ങൾ ക്രോഡീകരിച്ച് പ്രത്യേക നടപടികൾ സ്വീകരിക്കുമെന്നും കൃഷി മന്ത്രി അഡ്വ. ടി. സിദ്ദിഖ് പറഞ്ഞു. ഇതിനായി പട്ടികജാതി-പട്ടികവർഗ വകുപ്പ് മന്ത്രിയുടെ നേതൃത്വത്തിൽ പ്രത്യേക അവലോകന യോഗം വിളിച്ചുചേർക്കുമെന്നും അദ്ദേഹം അറിയിച്ചു.
പൊഴുതന സുഗന്ധഗിരിയിലെ 20 ഏക്കർ സ്ഥലത്താണ് 16.66 കോടി രൂപയുടെ കേന്ദ്ര-സംസ്ഥാന സർക്കാരുകളുടെ ധനസഹായത്തോടെ ഗോത്ര സ്വാതന്ത്ര്യസമര സേനാനി മ്യൂസിയം നിർമിക്കുന്നത്. കോഴിക്കോട് ചേവായൂരിലെ പട്ടികജാതി-പട്ടികവർഗ ഗവേഷണ, പരിശീലന, വികസന പഠന വകുപ്പ് (കിർടാഡ്സ്)യുടെ കീഴിലാണ് പദ്ധതിയുടെ നിർവഹണം.
