പരിയാരം: അന്താരാഷ്ട്ര പെൺകുട്ടികളുടെ ദിനത്തോടനുബന്ധിച്ച് പരിയാരം പി.എം.എം.ജെ. അൽബിർറ് സ്കൂൾ വിദ്യാർഥിനികൾ മുതിര കുഞ്ഞാ മിച്ചയെ സന്ദർശിച്ചു.
കാലത്തിന്റെ കയറ്റിറക്കങ്ങൾ കണ്ടും ജീവിതാനുഭവങ്ങളുടെ നീണ്ട വഴികൾ പിന്നിട്ടും കഴിയുന്ന മാമീച്ചയെ ചേർത്തുപിടിച്ച ഈ സ്നേഹസന്ദർശനം തലമുറകൾ തമ്മിലുള്ള ഹൃദയബന്ധത്തിന്റെ മനോഹരമായ മാതൃകയായി.
തിരക്കേറിയ ജീവിതത്തിനിടയിൽ പലപ്പോഴും മറന്നുപോകുന്ന മുതിർന്നവരുടെ സ്നേഹവും സാന്നിധ്യവും വിലമതിക്കാനും അവരുടെ അനുഭവങ്ങളിൽ നിന്ന് ജീവിതപാഠങ്ങൾ ഉൾക്കൊള്ളാനും കുട്ടികൾക്ക് ഈ സന്ദർശനം അവസരമൊരുക്കി. മാമീച്ചയുമായി വിശേഷങ്ങൾ പങ്കുവെച്ചും സ്നേഹസംഭാഷണങ്ങളിൽ ഏർപ്പെട്ടും കുട്ടികൾ ചെലവഴിച്ച നിമിഷങ്ങൾ ഹൃദയസ്പർശിയായി.
പെൺകുട്ടികളുടെ ആത്മവിശ്വാസവും സാമൂഹിക ഉത്തരവാദിത്വബോധവും വളർത്തുന്നതിനൊപ്പം കാരുണ്യം, കരുതൽ, ആദരവ്, മാനവികത തുടങ്ങിയ മൂല്യങ്ങൾ ജീവിതത്തിൽ പകർത്തുക എന്ന സന്ദേശവും ഈ സന്ദർശനം പകർന്നു നൽകി.
സന്ദർശനത്തിന് അധ്യാപികമാരായ സി എച്ച് ജസീല, എ എ സാജിറ, പികെ ജംഷീന, എം സൈഫുന്നിസ, സേവിക ഒ പി സബ്ന എന്നിവർ നേതൃത്വം നൽകി.
സ്നേഹം പങ്കുവെക്കുമ്പോൾ തലമുറകൾ തമ്മിലുള്ള അകലം കുറയുന്നു; കരുതലിന്റെ കൈകൾ നീളുമ്പോൾ ഹൃദയങ്ങൾ കൂടുതൽ അടുക്കുന്നു എന്ന സന്ദേശം പകർന്ന ഈ സന്ദർശനം അന്താരാഷ്ട്ര പെൺകുട്ടികളുടെ ദിനത്തെ അർത്ഥവത്താക്കി.
