കല്പ്പറ്റ: ലഹരിമരുന്ന് ഉപയോഗവും വില്പ്പനയും തടയുന്നതിനായുള്ള ‘ഓപ്പറേഷന് ഡി ഹണ്ടി’ന്റെ ഭാഗമായി അഞ്ച് ദിവസത്തിനുള്ളില് ജില്ലയിലെ വിവിധ സ്റ്റേഷനുകളിലായി 45 കേസുകള് രജിസ്റ്റര് ചെയ്ത് വയനാട് പോലീസ്. വില്പ്പനക്കായി എം.ഡി.എം.എ, കഞ്ചാവ് എന്നിവ സൂക്ഷിച്ചതിനും കഞ്ചാവ് നിറച്ച ബീഡി വലിച്ചതിനുമടക്കം 47 പേരെയാണ് ഇതുവരെ പിടികൂടിയത്. 14.29 ഗ്രാം എം.ഡി.എം.എയും, 184.31 ഗ്രാം കഞ്ചാവും, 37 കഞ്ചാവ് നിറച്ച ബീഡികളുമാണ് ഇതുവരെ പിടിച്ചെടുത്തത്.
കല്പ്പറ്റ പോലീസ് 22.08.2024 തീയതി നടത്തിയ പരിശോധനയില് എം.ഡി.എം.എയും കഞ്ചാവും പിടികൂടി. രണ്ട് പേരെ അറസ്റ്റ് ചെയ്തു. രാവിലെ പട്രോളിങ് ഡ്യൂട്ടിക്കിടെ കല്പ്പറ്റ വെള്ളാരംകുന്ന് ബസ് സ്റ്റോപ്പിന് സമീപത്ത് നിന്നാണ് 0.49 ഗ്രാം എം.ഡി.എം.എയുമായി മുട്ടില്, ചെറുമൂല വയല്, ചൊക്ലി വീട്ടില് സി. അബൂബക്കര്(48)നെയും, 5.16 ഗ്രാം കഞ്ചാവുമായി മുട്ടില്, പിലാക്കൂല് വീട്ടില് പി. ഷാജിദ്(39)നെയും അറസ്റ്റ് ചെയ്തത്. അബൂബക്കറില് നിന്ന് എം.ഡി.എം.എ ഉപയോഗത്തിനുള്ള ഒ.സി.ബി പേപ്പറും ചില്ലുകൊണ്ടുള്ള പെപ്പും കണ്ടെടുത്തു. വരും ദിവസങ്ങളിലും കര്ശന പരിശോധന തുടരുമെന്ന് വയനാട് പോലീസ് അറിയിച്ചു.
