പുൽപ്പള്ളി: ചെറ്റപ്പാലം സെന്റ് മേരീസ് ഇംഗ്ലീഷ് മീഡിയം സ്കൂളിന്റെ 28-മത് വാർഷികാഘോഷം വർണ്ണാഭമായി നടത്തി. സ്കൂൾ മാനേജിംഗ് സെക്രട്ടറി പി.പി. റെജി സ്വാഗതം പറഞ്ഞു. പനമരം ബ്ലോക്ക് പഞ്ചായത്ത് പ്രസിഡന്റ് ടി.എസ്. ദിലീപ് കുമാർ സാംസ്കാരിക സമ്മേളനം ഉദ്ഘാടനം ചെയ്തു. കുട്ടികളിൽ മൂല്യബോധവും സൃഷ്ടിപരമായ കഴിവുകളും വളർത്തുന്നതിൽ പ്രൈമറി വിദ്യാഭ്യാസത്തിന്റെ പങ്ക് ഏറെ വലുതാണെന്ന് അദ്ദേഹം പറഞ്ഞു. സ്കൂൾ മാനേജർ റവ. ഫാ. ഡോ. കുര്യാക്കോസ് വെള്ളച്ചാലിൽ അധ്യക്ഷത വഹിച്ചു. ഫ്ലവേഴ്സ് സ്റ്റാർ സിംഗർ സീസൺ-4 മത്സരാർത്ഥി മാസ്റ്റർ ഇവാൻ ജിനേഷ് കലാപരിപാടികൾ ഉദ്ഘാടനം ചെയ്തു. ബാലതാരമായ ഇവാന്റെ പാട്ടുകൾ ആഘോഷങ്ങൾക്ക് മാറ്റുകൂട്ടി. ചർച്ച് ട്രസ്റ്റി കെ.ജി. തങ്കച്ചൻ, മദർ പി.ടി.എ. പ്രസിഡന്റ് സ്മിത നിതീഷ്, സ്കൂൾ ലീഡർ മാസ്റ്റർ ഗോഡ്വിൻ ജിബിൻ എന്നിവർ ആശംസകൾ നേർന്നു. മാനേജ്മെന്റ്, അധ്യാപകർ, രക്ഷിതാക്കൾ എന്നിവരുടെ സഹകരണത്തോടെ സ്കൂൾ കൈവരിച്ച പുരോഗതി അഭിനന്ദനാർഹമാണെന്ന് പ്രസംഗകർ അഭിപ്രായപ്പെട്ടു. സ്കൂൾ പ്രിൻസിപ്പൽ കാർമ്മൽ എം.സി. വാർഷിക റിപ്പോർട്ട് അവതരിപ്പിച്ചു. പി.ടി.എ. പ്രസിഡന്റ് സിനീഷ് തോമസ് നന്ദി പറഞ്ഞു.
വിവിധ മത്സരങ്ങളിൽ മികവ് തെളിയിച്ച വിദ്യാർത്ഥികൾക്ക് വിശിഷ്ടാതിഥികൾ സമ്മാനങ്ങൾ വിതരണം ചെയ്തു. കുട്ടികളുടെ കലാപരിപാടികൾ കാണികൾക്ക് ആനന്ദം പകർന്നു. വേദിയിൽ അരങ്ങേറിയ നൃത്തങ്ങൾ നിറങ്ങളുടെയും താളങ്ങളുടെയും സംഗമമായി. കുട്ടികൾ അവതരിപ്പിച്ച ഫ്ലാഷ് മോബ് ഏറെ ശ്രദ്ധിക്കപ്പെട്ടു. വാർഷികാഘോഷം കുട്ടികൾക്ക് അവരുടെ കഴിവുകൾ തുറന്നുകാട്ടാനുള്ള വേദിയായും കാണികൾക്ക് ബാല്യത്തിന്റെ മധുരസ്മരണകൾ സമ്മാനിച്ച ഒരു മനോഹരമായ അനുഭവമായും മാറി.
