സംസ്ഥാനത്തെ പൊതു വിദ്യാഭ്യാസ മേഖലയിൽ വിദ്യാർത്ഥികളുടെ പഠന നിലവാരം ഉയർത്തുന്നതിനായി സർക്കാർ എല്ലാ സ്കൂളുകളും നവീകരിക്കുമെന്ന് പട്ടികജാതി-പട്ടികവർഗ്ഗ-പിന്നാക്കക്ഷേമ വകുപ്പ് മന്ത്രി ഒ. ആർ കേളു.
തൊണ്ടർനാട് ഗ്രാമപഞ്ചായത്തിലെ മക്കിയാട് ഗവ.എൽ.പി സ്കൂളിൽ നിർമ്മാണം പൂർത്തീകരിച്ച പുതിയ കെട്ടിടം ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. എല്ലാ വിദ്യാലയങ്ങളും ഹൈടെക് നിലവാരത്തിലേക്ക് കൊണ്ടുവരുകയാണ് സർക്കാർ നയമെന്ന് മന്ത്രി പറഞ്ഞു. വിദ്യാർത്ഥികളുടെ പഠന പുരോഗതി രക്ഷിതാക്കൾ കൃത്യമായി നിരീക്ഷിക്കണമെന്നും അതാത് പ്രദേശങ്ങളിലെ സ്കൂളുകളിലേക്കുതന്നെ കുട്ടികളെ ചേർക്കണമെന്നും മന്ത്രി നിർദ്ദേശിച്ചു. വിദ്യാഭ്യാസ നിലവാരം മെച്ചപ്പെടുത്തുന്നതിനായി രക്ഷിതാക്കളുടെയും അധ്യാപകരുടെയും സജീവ പങ്കാളിത്തം അനിവാര്യമാണ്. ഒരു കോടി രൂപ ചിലവിലാണ് മക്കിയാട് ഗവ.എൽ.പി സ്കൂളിന് കെട്ടിടം നിർമ്മിച്ചത്. 268 ചതുരശ്ര മീറ്റർ വിസ്തീർണത്തിൽ പൂർത്തിയാക്കിയ കെട്ടിടത്തിൽ നാല് ക്ലാസ് മുറികൾ, ടോയ്ലറ്റ് സൗകര്യങ്ങൾ, വരാന്ത, റാമ്പ് എന്നിവ സജ്ജമാക്കിയിട്ടുണ്ട്. കെട്ടിടത്തിന്റെ ഇലക്ട്രിക്കൽ പ്രവർത്തികളും പൊതുമരാമത്ത് വകുപ്പ് ഇലക്ട്രിക്കൽ വിഭാഗത്തിന്റെ മേൽനോട്ടത്തിൽ പൂർത്തീകരിച്ചിട്ടുണ്ട്.
തൊണ്ടർനാട് ഗ്രാമ പഞ്ചായത്ത് പ്രസിഡന്റ് എസ്. എം പ്രമോദ് അധ്യക്ഷനായ പരിപാടിയിൽ ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാന്റിങ് കമ്മിറ്റി ചെയർപേഴ്സൺ സൽമ മൊയിൻ, മാനന്തവാടി ബ്ലോക്ക് പഞ്ചായത്ത് അംഗം സിനി തോമസ്, തൊണ്ടർനാട് ഗ്രാമ പഞ്ചായത്ത് സ്റ്റാന്റിങ് കമ്മിറ്റി ചെയർമാൻമാരായ ഷിന്റോ കല്ലിങ്കൽ, ഷബീറ മൊയ്തു, ഗ്രാമ പഞ്ചായത്ത് അംഗം പയ്യംമ്പള്ളി രാമൻ, മാനന്തവാടി ബ്ലോക്ക് പ്രൊജക്റ്റ് കോ-ഓർഡിനേറ്റർ ഇ. എ സതീഷ് ബാബു, സീനിയർ അസിസ്റ്റന്റ് എൻ. അപ്സ, സ്കൂൾ പ്രധാനധ്യാപിക ജെസ്സി തോമസ്, എസ്. എം. സി ചെയർമാൻ കെ. കെ ഇസ്മായിൽ, എക്സിക്യൂട്ടീവ് എൻജിനീയർ എൻ. ശ്രീജിത്ത്, ജനപ്രതിനിധികൾ ഉദ്യോഗസ്ഥർ വിദ്യാർത്ഥികൾ പങ്കെടുത്തു.
