കെ.ജെ.ബേബിയുടെ നിര്യാണത്തിൽ അനുശോചിച്ച് പ്രിയങ്ക ഗാന്ധി.*
കൽപറ്റ: എഴുത്തുകാരനും സാമൂഹിക പ്രവർത്തകനുമായ കെ.ജെ.ബേബിയുടെ നിര്യാണത്തിൽ അനുശോചിച്ച് എ.ഐ.സി.സി. ജനറൽ സെക്രട്ടറി പ്രിയങ്ക ഗാന്ധി. കെ.ജെ.ബേബിയുടെ നിശ്ചയദാർഢ്യവും സാമൂഹി സേവനത്തിലെ സ്ഥൈര്യവും എല്ലാവർക്കും മാർഗദീപമാണെന്ന് സമൂഹ മാധ്യമമായ എക്സിൽ പ്രിയങ്ക ഗാന്ധി കുറിച്ചു. അരികുവൽക്കരിക്കപ്പെട്ടവരുടെ അവകാശങ്ങൾക്കു വേണ്ടി പോരാടുമ്പോൾ തന്റെ ശരികളിൽ ഉറച്ചു നിൽക്കാൻ ജീവിതത്തിലുടനീളം അദ്ദേഹത്തിന് സങ്കോചവുമുണ്ടായിരുന്നില്ല. വയനാടിന്റെ സാമൂഹിക സാംസ്കാരിക മേഖലയിൽ കെ.ജെ.ബേബിയുടെ സംഭാവന വലിയ സ്വാധീനം ചെലുത്തിയിട്ടുണ്ട്. കലയും സാമൂഹിക പ്രവർത്തനവും സമൂഹത്തിന്റെ മാറ്റത്തിനു നൽകുന്ന ഊർജ്ജത്തിന് കെ.ജെ.ബേബിയുടെ പ്രവർത്തനങ്ങൾ ഉദാഹരണമാണെന്നും അദ്ദേഹത്തിന്റെ കുടുംബത്തിന്റെ ദുഃഖത്തിൽ പങ്കു ചേരുന്നുവെന്നും പ്രിയങ്ക ഗാന്ധി പറഞ്ഞു.
