കല്പ്പറ്റ: ശമ്പളം മുടങ്ങിയതിനെത്തുടര്ന്ന് കെ എസ് ആര് ടി സി ഡിപ്പോക്ക് മുന്നില് കഞ്ഞി വെച്ച് പ്രതിഷേധം. കല്പ്പറ്റ ഡിപ്പോയിലെ പ്യൂണായ പള്ളിക്കുന്ന് സ്വദേശിനി രഞ്ജിനി ആണ് കഞ്ഞി വെച്ച് പ്രതിഷേധിച്ചത്. ഓണമായിട്ടും ആഗസ്റ്റ് മാസത്തെ ശമ്പളം ലഭിച്ചില്ലെന്ന് ഇവര് പരാതിപ്പെട്ടു. കഴിഞ്ഞ ആഗസ്റ്റ് മാസത്തില് 16 ഡ്യൂട്ടി വേണ്ടിടത്ത് പതിനഞ്ചര ഡ്യൂട്ടിയായിരുന്നു രഞ്ജിനിയെടുത്തത്. മകളുടെ മകന് ന്യുമോണിയ ബാധിച്ചു ആശുപത്രിയില് ആയതിനാലാണ് ഡ്യൂട്ടിക്ക് എത്താന് കഴിയാതിരുന്നതന്നാണ് രഞ്ജിനി പറയുന്നത്. ഭര്ത്താവ് മരണപ്പെട്ട രജിനി 18 വര്ഷമായി ഡിപ്പോയില് പ്യൂണായി ജോലി ചെയ്യുകയാണ്. അര ഡ്യൂട്ടിയുടെ പേര് പറഞ്ഞാണ് ശമ്പളം തടഞ്ഞു വച്ചിരിക്കുന്നതെന്നും, സാമ്പത്തികമായി കഷ്ടത അനുഭവിക്കുന്ന തനിക്ക് ജീവിക്കാന് മറ്റു മാര്ഗങ്ങള് ഇല്ലെന്നും അവര് പറഞ്ഞു. അതേ സമയം ഡിപ്പോയുടെ ഉത്തരവാദിത്വമല്ല ഇതെന്നും, തിരുവനന്തപുരത്തു നിന്നാണ് ശമ്പളം നല്കാനുള്ള തീരുമാനം എടുക്കേണ്ടതെന്നും സ്റ്റേഷന് മാസ്റ്റര് പ്രതികരിച്ചു
ശമ്പളം മുടങ്ങിയതിനെത്തുടര്ന്ന്; കെ.എസ്.ആര്.ടി.സി ഡിപ്പോക്ക് മുന്നില് കഞ്ഞിവെച്ച് പ്രതിഷേധം
