വയനാട് ജില്ലയിലെ കള്ളാടിയിൽ ഉണ്ടായ ഉരുൾപൊട്ടൽ ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങൾക്കുണ്ടായ ദുരിതത്തിലും തീരാ ദുഃഖത്തിലും വയനാട് ഇക്കോ ടൂറിസം അസോസിയേഷൻ പങ്കുചേരുന്നു.പ്രകൃതിയോട് ഇടപഴകി ജീവിക്കുന്ന നമ്മുടെ ജില്ലയിൽ ഇത്തരം ദുരന്തങ്ങൾ ആവർത്തിക്കുന്നത് അതീവ ആശങ്കയുണ്ടാക്കുന്നു. ദുരന്തത്തിൽ ജീവൻ നഷ്ടപ്പെട്ടവർക്കും പരിക്ക് പറ്റിയവർക്കും മറ്റു നഷ്ടങ്ങൾ ഉണ്ടായവർക്കും നീതിപൂർവ്വമായ നഷ്ടപരിഹാരം ഉറപ്പാക്കണമെന്നും അസോസിയേഷൻ സർക്കാരിനോട് ആവശ്യപ്പെടുന്നു
ഞങ്ങൾ *വികസനത്തിന് എതിരല്ല*. റോഡ്, ടൂറിസം, തൊഴിൽ – ഇതെല്ലാം ജനങ്ങൾക്ക് ആവശ്യമാണ്. പക്ഷേ ആ വികസനം *പ്രകൃതിയെ മാനിച്ചും, ശാസ്ത്രീയ പഠനങ്ങളുടെ അടിസ്ഥാനത്തിലും* ആയിരിക്കണം. പശ്ചിമഘട്ടത്തിന്റെ പരിസ്ഥിതി ലോല മേഖലകളിൽ മലകൾ വെട്ടിയും ജലപാതകൾ തടഞ്ഞും നടത്തുന്ന നിർമ്മാണങ്ങൾ മണ്ണിന്റെ ഉറപ്പ് കെടുത്തുന്നു. ഇത് ഉരുൾപൊട്ടലിന് കാരണമാകുന്നു. ഹ്രസ്വകാല ലാഭത്തിന് വേണ്ടിയുള്ള ചൂഷണം ജീവൻ കൊണ്ട് വില കൊടുക്കുന്ന അവസ്ഥയിലേക്ക് നമ്മളെ എത്തിക്കരുത്.
ഇതിനോടൊപ്പം *വയനാട് മുഴുവൻ ദുരന്തമേഖലയാണ് എന്ന തരത്തിലുള്ള തെറ്റായ പ്രചരണങ്ങൾ* ടൂറിസം മേഖലയെ മുഴുവനായി തകർക്കും എന്ന് ഞങ്ങൾ ആശങ്കപ്പെടുന്നു. കള്ളാടിയിൽ സംഭവിച്ചത് ഒറ്റപ്പെട്ട സംഭവമാണ്. വയനാട്ടിലെ സുൽത്താൻ ബത്തേരി, മാനന്തവാടി, കൽപ്പറ്റ, തിരുനെല്ലി, കുറുവദ്വീപ് തുടങ്ങിയ പ്രധാന ടൂറിസം കേന്ദ്രങ്ങൾ പൂർണമായും സുരക്ഷിതമാണ്. ഇവിടേക്കുള്ള വരവ് നിർത്തുന്നത് പ്രാദേശിക ജനങ്ങളുടെ ജീവിതത്തെ കൂടിയാണ് ഇല്ലാതാക്കുക.
അതുകൊണ്ട് സർക്കാരും മാധ്യമങ്ങളും *വസ്തുതകൾ അടിസ്ഥാനമാക്കിയുള്ള വാർത്തകൾ* മാത്രം നൽകണമെന്നും, ടൂറിസത്തെ സംരക്ഷിക്കാനുള്ള പ്രത്യേക പാക്കേജും പ്രചരണവും ഉണ്ടാകണമെന്നും ഞങ്ങൾ ആവശ്യപ്പെടുന്നു.
ദുരന്തബാധിതർക്ക് അടിയന്തര സഹായവും ശാസ്ത്രീയമായ പുനരധിവാസവും ഉറപ്പാക്കണം. അതോടൊപ്പം എല്ലാ വികസന പദ്ധതികൾക്കും കർശനമായ Environmental Impact Assessment, പ്രാദേശിക ജനങ്ങളുടെ പങ്കാളിത്തം എന്നിവ നിർബന്ധമാക്കണം.
വികസനം വേണം. പക്ഷേ അത് *മനുഷ്യനെയും മണ്ണിനെയും ടൂറിസത്തെയും ഒരുപോലെ സംരക്ഷിക്കുന്ന* സുസ്ഥിര വികസനമായിരിക്കണം.
വയനാട് ഇക്കോ ടൂറിസം അസോസിയേഷൻ
